542Views 0Comments
ތިރީގައި މި ފާހަގަކޮށްލަނީ ވާހަކަދެއްކުންތެރިއަކަށް ވުމަށް ޓަކައި މަސައްކަތްކުރާއިރު ތިމާގެ ޢަމަލުތައް ބަހައްޓަންޖެހޭ ބައެއް ގޮތްތަކާއި ސަމާލުކަން ދޭންޖެހޭ ބައެއް ކަންކަމެވެ.
- އަޑުއެހުންތެރިންނަށް ފޯރުކޮށްދިނުމަށް ޓަކައި ތިމާގެ ކިބައިގައި ރަނގަޅު މެސެޖެއް އޮތްކަން އަޑުއެހުންތެރިންނަށް ޔަޤީންކޮށްދޭން ބޭނުންވާނަމަ ފުރަތަމަ ކަމަކަށް ތިމާއަކީ ރަނގަޅު މީހެއްކަން އަޑުއަހެނުންތެރިންނަށް ވިސްނޭނެ ގޮތަކަށް ކުރީބައިގަ ތިމާގެ ޢަމަލުތައް ބަހައްޓަން އާދަކުރަން ވާނެއެވެ. މުޖުތަމަޢުގައި ތިމާއަކީ އަގުވެއްޓިފައިވާ މީހެއް ނަމަ އެމީހެއްގެ ވާހަކައަށް ސަމާލުކަން ދޭނެ މީހުންނެއް ނުތިބޭނެއެވެ.
- އަޑުއެހުންތެރިންގެ ފަރާތުން ފުރިހަމަ އެއްބާރުލުން ބޭނުންކަމަށް ވާނަމަ އެ އަޑުއެހުންތެރިންނާ ތިމާއާ ދެމެދު ރަނގަޅު ގުޅުމެއް އޮތްކަމުގެ އިޙުސާސް އުފައްދަން ވާނެއެވެ. މި އިޙްސާސް އުފެއްދޭނީ ދައްކާ ވާހަކައިގައި ޖަޒުބާތުގެ މިންވަރެއް ހިމަނައިގެންނެވެ.
- ތިމާ ބުނާގޮތް އެހެން މީހުން ހަދަން ބޭނުންވާ ކަމުގައި ވާނަމަ ތިމާގެ ވާހަކަ ބިނާކުރަންވާނީ ހަރުދަނާކަން އެކުލެވޭ، މަންތިޤީ ހަމަތަކުން (ލޮޖިކް) ޤަބޫލުކުރެވޭ، ޢިލްމީގޮތުން ބުރަދަންހުރި އަދި އަޚްލާޤީ މިންގަނޑުން މިނާއިރު ތެދުއެކުލެވުމާއެކު ބަސްމަގު ރީތި ގޮތަކަށެވެ. ތިމާ ދައްކާ ވާހަކައިގައި އެއްވެސް ހަރުދަނާކަމެއް ނެތިފައި ޢިލްމީ ބުރަދަނެއް ނެތްކަމުގައި ވާނަމަ އެދައްކާ ވާހަކައެއްވާނީ ހާސަރަށެވެ.
- ދައްކާ ވާހަކައިގައި އަނެކާއަށް ނުވަތަ އެހުންތެރިންނަށް ޢިބުރަތަކަށް ވާ ކަހަލަ މަޢުލޫމާތެއް ނުވަތަ ޙަދިސާއެއް ހިމަނަންވާނެއެވެ. ހަމަ އެހެންމެ އަނެކާ ކުޑައިމީސްވާކަހަލަ ލަފުޒެއް ނުވަތަ ޖުމުލައެއް ބުނެގެން ނުވާނެއެވެ.
- މުސްތަޤުބަލުގައި ކުރަން ރާވާ ކަމަކާމެދު ވާހަކަދައްކާ ނަމަ އެކަމަކުން މީސްތަކުންނަށް ނުވަތަ އެކަމެއް އަމާޒުވާ ބަޔަކަށް ލިބިގެންދާނެ ފައިދާއަކާ ބެހޭގޮތުން ވާހަކަދައްކަން ވާނެއެވެ. މިފަދަ ވާހަކަތައް ވެސް ބިނާކުރަންވާނީ މަންތިޤީ ހަމަތަކާއި ޢިލްމީ ބުރަދަނާއި ޢާންމު ވިސްނުމުން ވެސް ބަލައިގަންނަން ފަސޭހަ ވާނޭ ގޮތެއްގެ މައްޗަށެވެ.
- ލިބުނު ކާމިޔާބީއެއް ފާހަގަކުރުމުގެ ގޮތުން ވާހަކަދައްކާ ނަމަ އެ ކާމިޔާބީ ހޯދުމުގައި ބައިވެރިވި އެންމެންގެ އަގުވަޒަންކޮށް އެބަޔަކަށް ޙައްޤުވާ ޝުކުރު އަދާކުރަންވާނެއެވެ. އަދި ކާމިޔާބު ހޯދުނީ އެންމެން ގުޅިގެން ކުރި މަސައްކަތުންކަން ފާހަގަކޮށް ކާމިޔާބީއަކީ އެންމެންނަށް ލިބުނު އެއްޗެއް ކަމުގައި ބަޔާންކުރަންވާނެއެވެ.
- ވަކި މައުޟޫއަކަށް ވާހަކަދައްކާނަމަ އެ މައުޟޫއަކާ ގުޅޭގޮތުން އެކަށޭނަ ދިރާސާކޮށް ފުރިހަމަ މަޢުލޫމާތު ހޯދަންވާނެއެވެ. މިޒަމާނަކީ ކޮންމެ ވާހަކައެއް ދެއްކިޔަސް ފަސޭހަކަމާއެކު ދޮގުތެދު ބަލައިލެވޭ ޒަމާނަކަށް ވާތީ، ތެދު މަޢުލޫމަތު ހާމަކުރުމަށް ޚާއްޞަ ސަމާލުކަމެއް ދޭންވާނެއެވެ. އަމުދުން ތިމާއަށް ނޭނގޭ ކަމެއްގެ ވާހަކަ އެނގޭ ކަމަށް ހަދައިގެން ދައްކަން ނަހަދާށެވެ. އެހުންތެރިންގެ ތެރޭގައި އެކަންކަން ތިމާއަށް ވުރެ މޮޅަށް ދަންނަ މީހުން ތިބުމަކީ ވަރަށް އެކަށޭނަ ކަމެކެވެ.
- ވާހަކަދައްކާއިރު ދައްކާ ވާހަކައިގައި ހަމަޖެހޭ ތަރުތީބެއް އޮންނަންވާނެއެވެ. އަޑުއެހުންތެރިންނަށް އެ ވާހަކައެއް ދެނެގަންނަންފަސޭހަވާނީ އޭރުންނެވެ. ވާހަކަދެއްކުމަށް ޓަކައި ހޯދި މަޢުލޫމާތުތައް ހުންނަންވާނީ ރަނގަޅު ތަރުތީބަކުން އަތުރާލެވިފައެވެ.
- ވާހަކަދެއްކުމުގައި އަބަދުވެސް އެންމެ މުނާސަބު ލަފުޒުތައް ބޭނުންކުރާށެވެ. އަދި ވާހަކައިގައި ސާދާ ގޮތް ގެންގުޅެންވާނެއެވެ. ބޭނުންކުރާ ބަސްމަގު ކަނޑައަޅަންވާނީ އަޑުއަހަންތިބޭ ބައެއްގެ ފެންވަރަށް ބަލާފައެވެ.
- އެއްޗެއް ބަލައިގެން ކިޔުމަށް ވުރެ ތިމާގެ އަމިއްލަ ވިސްނުމުން ވާހަކަ ކުރިއަށް ގެންދިއުމުން އަޑުއެހުންތެރިންނާ ދެމެދު އޮންނަ ގުޅުން މާ ބަދަހިވާނެއެވެ. އަދި މިގޮތަށް ވާހަކަދައްކަން އާދަކުރުމުން ތިމާގެ ވިސްނުމާއި ދޫފަރިތަކަން އިތުރަށް ތަރައްޤީވެ ވާހަކަދައްކަން ފަސޭހަވާނެއެވެ. އަދި ޖެހިލުންވުން ކުޑަވެ އަމިއްލަ ނަފުސަށް އޮންނަ ޔަޤީންކަން އިތުރުވާނެއެވެ.
