1253Views 0Comments
ދުނިޔެއަށް ޖެހެމުން މިދާ ތަރައްޤީގެ ހަމަވައި ވޭތުވެދިޔަ އަހަރުތަކުގައި އަޅުގަނޑުމެން ދިވެހިންނަށް ވެސް އައީ ލިބެމުންނެވެ. އެކި މޫސުމުގައި އެކިވަރަށެވެ. ދުވެލި މަޑުވާ ފަހަރާއި ބާރުވާ ފަހަރެވެ. ޔަޤީނުން ވެސް އެނގޭ ކަމަކީ ތަރައްޤީ އަންނަކަމެވެ. ނަމަވެސް މިތަރައްޤީ އަޅުގަނޑުމެންނާ ހަމައަށް އަންނަނީ ދުނިޔޭގެ އެހެންވެސް ތަރައްޤީ ވެފައިވާ ޤައުމުތަކަށް އައިސްފައިވާ ބީދައިންތޯ ބަލާލުން އެއީ އަޅުގަނޑު ހިތުން ނެތްކަމެއް ނޫނެވެ. އެބައިމީހުންގެ ތަރައްޤީ އާއި އަޅުގަނޑުމެން މި ކިޔާ ތަރައްޤިއާ ހުރި ތަފާތަކީ ކޮބައިތޯ މިނެކިރާލަންޖެހެއެވެ. ޝައްކެއް ނެތްގޮތުގައި މި ތަރައްޤީ މިނެކިރޭނެ އެންމެ ރަނގަޅު އެއް މިންގަޑަކަށްވާނީ އެ މުޖްތަމަޢެއްގައި ދިރިއުޅޭ ފަރުދުންގެ އެކިއެކި ކަންކަމަށް އަންނަ ބަދަލުތައް، ތަރައްޤީއާއި ތަހުޒީބުގެ ތަރާދުން ކިރާލައި އޭގެން ބުރަދަން ހުރީ ކޮންކޮޅަކަށްތޯ ބަލައިލެވިގެންނެވެ.
ތަނެއް ތަރައްޤީ ވާވަރަކަށް އެމާޙައުލެއްގައި އުޅޭބައެއްގެ ޢަމަލުތައް ތަހުޒީބުވާން ޖެހޭނެއެވެ. ހަމައެކަނި ތަރައްޤީ ވިޔަކަސް އަދި އެ ތަހުޒީބު ވީއެއް ނޫނެވެ. ތަރައްޤީގެ ހަޤީޤީ މާނަ އަންނަނީ އޭގެތެރެއަށް ތަހުޒީބުގެ ލަފުޒު ވެސް އިތުރުކޮށްލެވިގެންނެވެ. ދުނިޔޭގެ ތަރައްޤީގެ ވާހަކަ ދައްކާއިރު އެންމެފުރަތަމަ ވެސް ސިންގަޕޫރުގެ ވާހަކަ ދުލަށް އަންނަނީ ކީއްވެގެންތޯއެވެ؟ ތަރައްޤީއާއި ތަހުޒީބު އެއްތަނަކުން ފެންނަން އޮތީ އެ ޤައުމުން ކަމުގައި ވާތީއެވެ. އަޅުގަނޑުމެން ވެސް ތަރައްޤީއާއި ތަހުޒީބުގެ ރޮނގުން ސިންގަޕޫރު އޮތް ހަމައަށް ދާންބޭނުންވާ ނަމަ ކަންކަން ކުރުމުގައި ތަހުޒީބު ގޮތްތައް ޚިޔާރުކުރަން އެބަޖެހެއެވެ. އަޅުގަނޑުމެން ކަންކަން ކުރުމުގައި ގެންގުޅޭ މިންގަނޑުތައް ތަރައްޤީއާއި ތަހުޒީބުވެފައިވާ އެހެނިހެން ޤައުމުތަކުގެ މިންގަނޑުން ކިރާލަމާ ހިނގާށެވެ. ބަރުވާ ކޮޅެއްވެސް އެނގޭނީ ބަލައިލީމަތާއެވެ.
މިއަދު އަޅުގަނޑުމެން ތަރައްޤީ ވެފައިވާ މިންވަރަކީ އިއްޔެ މެންދުރު ވަޒީފާއަށް ވަތް ކުއްޖާ ވެސް ސަވާރީއެއްކަމުގައި ބޭނުންކުރާނީ ސައިކަލެކެވެ. ނަމްބަރު ބޯޑްގައި އޮތީ “ޕީ” ކަމެއް “ސީ” ކަމެއް ކިޔާނެކަމެއް ނެތެވެ. ޔަޤީނުން ވެސް ދުއްވަނީ ސައިކަލެވެ. ބައިސްކަލް މިހާރު އެއީ ރާއްޖޭގައި އުޅޭ ބިދޭސީ ލޭބަރުންނަށް ޚާއްސަ އެއްޗެއްކަމުގެ ލޭބަލް އޮންނަނީ ކުރެވިފައެވެ. މިދެންނެވި ތަރައްޤީގެ ފަސޭހަތަކާ އެކު މަގުމަތީގައި އުޅޭއުޅުމުގައި އުމުރުން ދުވަސްވީމީހަކު ޓެކްސީއަކުން ފައިބަން އެނަގާ ވަގުތުކޮޅުގައި ވެސް ކެތްތެރިކަމެއްނެތި މަޑުކޮށްލައިގެން އިނުމުގެ ބަދަލުގައި، ކައިރި ހިސާބުގަނޑުގެ ކުޑަކުދިން ހޭލާވަރަށް ބަރުގޮނު އެޅޭކަމުގައި ވާނަމަ ތަރައްޤީ އަދި ވިޔެއްކަމަކު ތަހުޒީބު އެ ނުވަނީއެވެ.
ކިތަންމެ ބޮޑު ޢަދަދަކުން ނޫޓް ނަގަން ބޭނުންވެގެން ކަމުގައިވިޔަސް އޭ.ޓީ.އެމް މެޝިންތަކުގެ ކައިރީގައި ކިޔުގައި ހުންނައިރު އެތަނުގައި ތިބޭ އުމުރުން ދުވަސްވީ މީހުންނަށް ނުވަތަ މާބަނޑު އަންހެނުންނަށް ނުވަތަ ކުޑަކުއްޖަކު އުރައިގެން ހުންނަ މީހަކަށް އިސްކަންދިނުމުގެ ބަދަލުގައި ތިމާގެ ނަފުސު އިސްކުރާނަމަ އަދި އެހިސާބުން އެތަހުޒީބުވީކަމަކަށް ނުބެލެވޭނެއެވެ. ހަމައެއާ އެކު ފެރީ ނުވަތަ ބަހުގައި ދަތުރުކުރާއިރު މާބަނޑު މީހުންނަށް ނުވަތަ ދުވަސްވީ މީހުން އިށީނުމަށް ހަމަޖެހިފައި ހުންނަ ގޮނޑިއާއި ދިމާލުގައި ލިޔެފައިވާ ލިއުންކޮޅަށް ސަމާލުކަން ދިނުމެއް ނެތި އެގޮނޑީގައި އިށީނދެވޭ ކަމުގައިވާނަމަ ދެންނެވޭނީ ތިމާ އަދި ތަޢުލީމީގޮތުން ކިތަންމެ މަތީ ސަނަދެއް ޙާޞިލްކޮށްގެން ހުރިކަމުގައިވިޔަސް އެހޯދި ތަޢުލީމަކުން ލިބުނު ތަހުޒީބެއް ނެތްކަމުގައެވެ.
ބާޒާރަށް ނުކުމެ އުޅޭއިރު ތިމާ ވަންނަ ފިހާރައިގެ ދޮރުފަތް، ފަހަތުން އަންނަ މީހާގެ މޫނުމައްޗަށް ދޫކޮށްލެވޭނަމަ ޖީބުގައި އަދި އޮޑިޖެހި ނޫޓްގެ ކިތަންމެ ބައިވަރެއް ހުއްޓަސް ހަމަ ހިމަނައިލަން މިޖެހެނީ ތަހުޒީބު ނުވާ ގިންތީގައެވެ. ފިހާރައިން ނުކުންނަން އަންނަ މީހާ ހުޅުވާލާ ދޮރުން، އޭނާ ދޮރުވާނަކަށް ހަދާފައި ތިމާ އޭނާގެ އަތްދަށުން ފިހާރަތެރެއަށް ލޫދިގެން ދިޔުން ވެސް މި ހިމަނާލެވެނީ ހަމަ ތަހުޒީބު ނުވާ މީހުންގެ ސިފަތަކުގެ ތެރޭގައެވެ.
ބައެއްގެ ތެރޭގައި އުޅޭ އުޅުމުގައި ތިމާއަކީ މާ ކަންތައް އެނގޭ މީހެއްކަމަށް ހިތައި އެހެންމީހުން ވާހަކަ ދެއްކުމަށް ފުރުޞަތުނުދީ، ނުވިތާކަށް އެއްވެސް އިޙްތިރާމެއް ނުބަހައްޓައި އަޑުގަދަކޮށް ވާހަކަދައްކާ ހަދާނަމަ އަދި ތިމާއަކީ ކިތަންމެ ކަންކަން ދަންނަ މީހަކުކަމުގައިވިޔަސް އެއީ ތަހްޒީބު މީހެކޭ ބުނެވޭނެ ޖާގައެއް ނެތެވެ.
ޕާޓީތަކަށް ގޮސް އުޅޭ އުޅުމުގައި ވެސް ތަނުގެ މޫރިތި ކަން ގެއްލޭ މިންވަރަށް މަޖާކޮށް، ތަނަށް ޖެހި ގޮށްރާޅެއްހެން އުޅޭ ކަމުގައިވާނަމަ އަރިހުގައި އަދި ކިތަންމެ ނިޔަނެތި ކަނބަލެއް ހުއްޓަސް އެ ހުރެވުނީ ހަމަޔަޤީނުން ވެސް ތަހުޒީބު މީހަކާއެކުއޭ، އޭނާއާ ދިމާއަށް ބުނެވޭނެ ގޮތެއް އަޅުގަނޑަކަށް ނުވިސްނެއެވެ.
ރައްޓެހި ރަޙުމަތްތެރިންނާއެކު ކޮފީމޭޒުތަކުގައި ވަގުތު ހޭދަކޮށްލާ، ދުނިޔަވީ ވާހަކަތައް ދައްކާލާ ގުޅުން ބަދަހިކޮށްލުމުގެ ނިޔަތުގައި ނަމަވެސް އެފަދަ ތަންތަނަށް ގޮސް އުޅޭއުޅުމުގައި ޖެހިގެން ހުންނަ މޭޒުކައިރީގައި ހުރި ހުސްގޮނޑި، އެ މޭޒުގައި އިންސާފުކުރަމުންދާ މީހުންގާތު އަހާލުމެއް ކަހާލުމެއް ނެތި ބޭނުންކޮށްލެވޭ ކަމަށްވާނަމަ، ރައްޓެހިންގެ ކުރިމަތީގައި ކޮފީދިނުމުގައި ކިތަންމެ ދީލަތި މީހަކުކަމުގައި ވިޔަސް އެއީ ތަހުޒީބު މީހެކޭ ނުބުނެވޭނެއެވެ. އަދި އެހެންވާހަކައެކެވެ. ތިމާ ކޮފީއަށް އިންސާފު ކުރަމުންދާއިރު ބައެއްފަހަރު އެ ދަމާލެވޭ ސިނގިރޭޓުން ބޭރުކޮށްލެވޭ ދުން އެއީ ޖެހިގެންހުރި މޭޒުގައި އިންސާފުކުރަންތިބި އާއިލާއެއްގެ އެންމެ ތުއްތު މެންބަރުންނާ ހަމައަށް ވެސް ފޯރާ ގޮތަށް ދޫކޮށްލެވޭ އެއްޗަކަށްވާނަމަ، އެހާލަތުގައި ވެސް ލެވެން މިއަންނަނީ ހަމަ އެއްކަލަ ތަހުޒީބު ނުވާ މީހުންގެ ގޮޅިއަށެވެ.
މި ލިއުމުގައި މި ފާހަގަކޮށްލެވުނު ކަންތައްތަކަކީ ބައެއްމީހުންނަށް ފަހަރުގައި ވަރަށް އާދައިގެ ކަންތައްތައް ކަމަށް ހީވެދާނެއެވެ. ނަމަވެސް އަޅުގަނޑުގެ ނަޒަރުގައި މިއީ ހަމަ ބޮޑެތިކަންކަމެވެ. މީހާ އަކީ އުޅުންހުރި ގޮތެއްހުރި، މީހެއްކަމުގައި ފެނިގެންދާނީ މިފަދަ ކަންތައްތަކަށް ސަމާލުކަން ދެވިގެންނެވެ. އަޅުގަނޑުމެން ކޮންމެ ތަނެއްގައި އުޅުނުކަމުގައި ވިޔަސް ވަކިކަހަލަ ސުލޫކީ މިންގަނޑުތަކެއް އެމާޙައުލަކާ ނުވަތަ އެމުޖްތަމަޢަކާ ގުޅޭގޮތެއްގެ މަތިން ބަހައްޓަންޖެހެއެވެ. އެހެންމީހުންނަށް އިޙްތިރާމް ކުރަންޖެހެއެވެ. ދަރިންނަށް ރިވެތި އާދަތައް ދަސްކޮށްދޭން ޖެހެއެވެ. ޒުވާނުންގެ ކިބައިގައި ތަހުޒީބު އާދަތައް އަށަގަންނުވަންޖެހެއެވެ. އިސްލާމީ ރިވެތި ސިފަތައް ހިތްތަކަށް ވައްދަން ޖެހެއެވެ. ދިވެހިންނަކީ އޯގާތެރި ހިތްހެޔޮ އުޅުންހުރި ބައެއްގެ ގޮތުގައި ދިވެހިރާއްޖެއަށް ޒިޔާރަތްކުރި އެތައް ބަޔަކު ވަނީ ސިފަކޮށްފައެވެ. މިކަން މިގޮތުގައި ދެމެހެއްޓޭނީ ބަދަލުވަމުން މިދާ ދުނިޔޭގައި ދިވެހިންނަކީ އުޅުންހުރި ގޮތްހުރި ބައެއްގެ ގޮތުގައި ދެމިތިބެވިގެންނެވެ. ދިވެއްސަކަށް ވީތީ ފަޚްރުވެރިވެވެން އޮތީ އޭރުންނެވެ.
