މީހުން މީހުންނަށް ވާނީ މީހުން މީހުންނަށް ހެދީމައެވެ

މަތީގައިވާ ސުރުޚީގައިވާ އިބާރާތަކީ އަޅުގަޑުމެންގެ ދިވެހިންގެ ތެރޭގައި ވަރަށް ޢާންމުކޮށް ބުނެ އުޅޭ އިބާރާތެކެވެ. ވަރަށް އިހުއްސުރެން ފެށިގެން ތަހުޒީބުގެ މިއަދާ ހަމައަށް ވެސް މެއެވެ. އެހެންނަމަވެސް މި އިބާރާތުން ދޭހަވާ އެއްޗަކާ މެދު ވިސްނަނީ ކިތައްމީހުން ބާވައެވެ. ކިތައް ވެރިން ބާވައެވެ. ކިތައް މުވައްޒަފުން ބާވައެވެ. ނޫނީ ކިތައް އޮގަނައިޒޭޝަނުން ބާވައެވެ. ހައްތަހާ ވެސް ސުވާލެވެ. އެހެންވީރު ޖަވާބެއް ވެސް އޮންނަންވާނެތާއެވެ. އެހެންކަމުން މި ލިއުމުގައި އަޅުގަޑަށް ދޭހަވާ މިންވަރަކުން މި އިބާރާތުން ދޭހަވާ އެއްޗަކާ ބެހޭގޮތުން އަލިއަޅުވާލައި ލިއުން ނިމޭ ހިސާބުން ނަމަވެސް ޖަވާބަކާ ހަމައަށް ދެވޭތޯ މަސައްކަތްކުރާނަމެވެ

އިބާރާތައް ބަލާއިރު އޭގައި ދެފަރާތެއްގެ ހިއްސާވުން އެބަ ހިމެނެއެވެ. އެހެން ގޮތަކަށް ބުނާނަމަ އެއީ ކަންކުރަން ޖެހޭ ފަރަތާއި ކަންކުރުމަށް ހަވާލުކުރާ ފަރާތެވެ. ނުވަތަ ވަޒީފާ ދޭ ފަރާތާއި ވަޒީފާގެ މަސްއޫލިއްޔަތު އަދާކުރަންޖެހޭ ފަރާތެވެ. އާދައިގެ ގޮތަކަށްނަމަ “ވެރިޔާ” އާއި ދަށުން މަސައްކަތް ކުރަން ތިބޭ މުވައްޒަފުންނެވެ. މި ބަނދިވަރު މާދިގުނުކޮށް ފުރަތަމަ މިތަނުން ކޮންމެވެސް އެއްފަރާތަކާއި ބެހޭގޮތުން އެއްޗެއް ލިޔެލެވޭތޯ މައުޟޫގެ ހިޔަލުގައި އަޅުގަނޑު ކުރިއަށް ދާނަމެވެ

ފުރަތަމަ ތިރިން ފަށަމާ ހިނގާށެވެ. މަތިން ފަށަން ހަދައިގެން ވެއްޓިދާނެތީއެވެ. އެއްފަހަރުން ބޮންތީގައި ހިފަން އުޅޭމީހުންނަށް ވާގޮތް ވެދާނެތީ ގަންނަ ބިރެއްގެ ސަބަބުންނެވެ. އެހެންކަމުން މިފަށަނީ ވެރިމީހާގެ ދަށުން މަސައްކަތް ކުރަން އުޅޭ މީހުންނާ ހަމައިންނެވެ. ތިމާ “މީހަކަށް” ވޭތޯ ހަމަ ކޮންމެ މީހަކު ވެސް މަސައްކަތް ކުރާނެއެވެ. މި ދެންނެވުނީ އަދި އެންމެ ރަނގަޅަކަށް ނޫނެވެ. އެއީ “އެޅިހާބަތަކަށް ރިހަ” އަޅައިގެން ތިބޭމީހުން ވެސް އަޅުގަޑުމެންގެ މާހައުލުން ފެންނަލެއް ގިނަކަމުންނެވެ. އެހެންކަމުން ރަނގަޅުގޮތަކީ ކޮންމެ މީހަކުވެސް “މީހަކަށް” ވޭތޯ ގަދައަޅައި މަސައްކަތް ކުރަންވާނެ މިހެން ބުނިއްޔާއެވެ. މި ޖެހުނީ އަނެއް ހަކަންތަކެވެ. މީހަކު ވާނީ ހަމަ މީހަކަށް ނޫންހެއްޔެވެ؟ ދެން އެހެންވީރު މީހަކަށްވާކަށް ކޮންމެހެން އިތުރަށް ކުރަންޖެހޭ ކަމެއް އެބައޮތްހެއްޔެވެ؟ އާއެކެވެ. އަޅުގަޑުގެ ނަޒަރުގައި މިވަރަކުން މީހަކަށް ނުވެއެވެ. އެ ވެވެނީ “ގަމީހަކަށެވެ”.

ވަޒީފާގައި އުޅޭއިރުވެސް އުނގެނުމަށް މަސައްކަތްކުރަން ޖެހެއެވެ. ހުނަރު ތަރައްޤީ ކުރުމަށް މަސައްކަތް ކުރަން ޖެހެއެވެ. ކިޔެވުމަށް ހުރި ފުރުޞަތު ތަކަކީ ކޮބައިތޯ އަބަދުވެސް ބަލައި އެފަދަ ފުރުޞަތު ތަކުގެ ބޭނުން ހިފަން ޖެހެއެވެ. ކުރާ މަސައްކަތުގެ ފެންވަރު ރަނގަޅުވާނީ އޭރުންނެވެ. ކުރިއަށް ދެވޭނީ އޭރުންނެވެ. ވަޒީފާ ލިބިފައި އޮތަތީވެ، މަހުންމަހަށް މުސާރަ ނަގައިގެން ދުވަހުންދުވަހަށް ކުރަންޖެހޭ މަސައްކަތްތައް ކޮށްގެން މިޒަމާނުގެ ވަޒީފާގެ ބާޒާރުގައި ހިފަހައްޓައެއް ނުލެވޭނެއެވެ. ތިމާއަށްވުރެ މޮޅަށް އުނގެނި ދަސްކޮށްގެން ތިބޭ އެތައްބަޔަކު ކޮންމެ ދުވަހަކު މި ބާޒާރަށް ނުކުންނަމުން ދާނެއެވެ. އެހެންކަމުން ތިމާގެ ހުރި “ފެންވަރު”  ވެރިންނަށް ދައްކައިދޭން އެބަ ޖެހެއެވެ. ތަފާތު ގޮންޖެހުންތަކާ ކުރިމަތިލައިގެން ކަންކަން ކާމިޔާބުކުރުމުގެ ރޫހު ހުރިކަން ދައްކައިދޭންޖެހެއެވެ. ތިމާ “މީހަކަށް” ވާނީ އޭރުންނެވެ. ތިމާ މީހަކަށް ހަދައިދިނުމަށް ތިބި މީހުންނަށް ވެސް އެކަން ކުރެވޭނީ ތިމާގައިގަ ވެސް އާރެއް ލައިފަ ހުރެގެންތާއެވެ.

ކޮންމެ ކަމެއް ވެސް ރަނގަޅަށް ކުރެވޭނީ އެ މަސައްކަތެއް ކުރަން ތިބޭ ބަޔަކަށް އެ މަސައްކަތެއް ރަނގަޅަށް ކުރަން އެނގޭނަމައެވެ. ވެރިން އަދި ހަމައެކަނި ކަމެއް ކުރަންވީގޮތް ބުނެދިނަސް އެކަމެއް ކުރާކަށް މަދު މީހަކަށް ނޫނީ ނޭނގޭނެއެވެ. އެހެންކަމުން މުވައްޒަފުންނަށް ތަފާތު ތަމްރީންތަކުގައި ބައިވެރިވުމުގެ މަގު ތަނަވަސްކޮށްދޭން ޖެހެއެވެ. އެކަމަށް އިންވެސްޓް ވެސް ކުރަންޖެހެއެވެ. ތިމާގެ “ދަށުން” މަސައްކަތްކުރާ މީހުންގެ ގޮތުގައި ދުށުމުގެ ބަދަލުގައި “އެކުގައި” މަސައްކަތްކުރާ މީހުންގެ ގޮތުގައި ދެކި ބިނާކުރަނިވި ވަރުގަދަ ޓީމް ރޫހެއް އާލާކުރެވިގެންނެވެ. އާކަންތައްތަކަށް އަހުލުވެރި ވުމުގެ މުހިންމުކަން އަންގައިދެވިގެންނެވެ. ގޮންޖެހުންތަކާ ކުރިމަތިލާން ދަސްކޮށް ދެވިގެންނެވެ.

ވެރިން އެކަނި ހުރިހާ އެއްޗެއް ކިޔަވައިގެން ތިބެގެން އަދި އޮގަނައިޒޭޝަނެއް ކުރިއަކަށް ނުދާނެއެވެ. ކުރިއަރާނީ ތިމާ ވެސް ކުރިއަށްދަމުން އެހެންމީހުން ވެސް ގޮވައިގެން ދިޔައީމައެވެ. އެހެންމީހުން ވެސް މީހުންނަށް ހަދައިގެންނެވެ. އެހެންމީހުންނަށް ފުރުޞަތު ތަނަވަސްކޮށްދީގެންނެވެ. މީހުން މީހުންނަށް ވާނީ މީހުން މީހުންނަށް ހެދީމައެވެ. އެކަން ކުރެވޭނީ ދެފަރާތުން ވެސް އެކަމަށް މަގުފަހިކޮށްދީ ގެންނެވެ. އެކަނި މަސައްކަތް ކުރިޔަކަސް އަދި މީހަކަށް ނުވެވޭނެއެވެ. އެކަންކަމަށް މަގުފަހިވެސް ކޮށްދޭން ޖެހެއެވެ. އެހެންނޫނީ ދެފަރާތުންކުރެ އެއްފަރާތެއް ވެސް މީހުންނަކަށް ނުވެވޭނެއެވެ. ވެރިންވެސް މެއެވެ. މުވައްޒަފުންވެސް މެއެވެ. ޖަވާބު ލިބިއްޖެކަމަށް ހީކުރަމެވެ