ހުޅަނގު މޫސުމުގެ ނަކަތްތައް

ދިވެހިންނަކީ އެންމެ އިހުއްސުރެ މޫސުން ބެލުމަށް އަމިއްލަ ގޮތްތަކެއް ގެންގުޅެމުން އައިސްފައިވާ ބައެކެވެ. ދިވެހިންނަކީ ކަނޑު ދަތުރުފަތުރުކޮށް އުޅޭ ބަޔަކަށް ވާތީ، މޫސުމީ ބަދަލުތައް ކުރިއާލައި ލަފާކޮށްލަން އެނގުން އޮތީ ވަރަށް މުހިންމު ކަމަކަށް ވެފައެވެ. ހަމައެހެންމެ އިހުގައި ދިވެހިންނަކީ ބޭނުންވާ ކާބޯތަކެތި ދަނޑުވެރިކަން ކޮށްގެން ރާއްޖޭގައި ހައްދައިގެން ބޭނުންކުރާ ބަޔަކަށް ވާތީ، ރަނގަޅަށް ދަނޑުވެރިކަން ކުރުމަށް ޓަކައި ވެސް އަހަރުގެ އެކި ދުވަސްވަރުގައި މޫސުމަށް އަންނަ ބަދަލުތައް އެނގުން އޮތީ ވަރަށް މުހިންމު ކަމަކަށް ވެފައެވެ.

މުޅި އަހަރުތެރޭގައި އެކި ދުވަސްވަރު މޫސުމަށް އަންނަ ބަދަލުތައް ދެނެގަނެ ދިވެހި ކާބަފައިން ވަނީ އަހަރުގެ އެކި ދުވަސްވަރަށް ތަފާތު ނަންތަކަކުން ނަންދީފައެވެ. މިގޮތުން އަހަރު ދުވަސް ވަނީ ތަފާތު 27 ބަޔަކަށް ބަހާލައިފައެވެ. މި ދުވަސްތައް ބަހާފައި ވަނީ ބައެއް ދުވަސްތަކަށް 14 ދުވަސް އަނެއް ބައި ދުވަސްތަކަށް 13 ދުވަސްވާނޭހެންނެވެ. މި ކޮންމެ ވަކި ދުވަސްވަރަކަށް ވަކި ނަމެއް ދީފައިވެއެވެ. މި 27 ބަޔަކީ އަހަރެމެން މިކިޔާ ނަކަތްތަކެވެ. ޖުމްލަ 27 ނަކަތެވެ. މި 27 ވަނީ ދެ ބަޔަކަށް ބަހާލާފައެވެ. އެއީ އިރުވައި މޫސުމުގެ ނަކަތްތަކާއި ހުޅަނގު މޫސުމުގެ ނަކަތްތަކެވެ.

އިރުވައި މޫސުމުގައި ހިމެނެނީ 9 ނަކަތެވެ. އެއީ މުލަ، ފުރަހަޅަ، އުތުރަހަޅަ، ހުވަން، ދިނަށަ، ހިޔަވިހާ، ފުރަބަދުރުވަ، ފަސްބަދުރުވައާއި ރޭވައެވެ. އިރުވައިގެ ނަންދީފައި މި ވަނީ އިރު އުތުރުން ވައިޖެހޭ ދުވަސްތަކަށެވެ. “އިރުވައި” މި ލަފުޒުގެ މާނައަކީ އިރުމަތިން ޖެހޭ ވައެވެ. އިރުވައި މޫސުން ފެށޭ ދުވަހަކީ ޑިސެންބަރު މަހުގެ 10 ވަނަ ދުވަހެވެ. ނިމޭ ދުވަހަކީ އޭޕްރީލް 7 ވަނަދުވަހެވެ. މި ދެމެދުގައިވާ ދުވަސްތައް ވަނީ ޖުލްމަ 9 ބަޔަކަށް ބަހާލާފައެވެ. އެއީ އިރުވައި މޫސުމުގެ 9 ނަކަތެވެ.

ހުޅަނގު މޫސުމޭ ކިޔަނީ ހުޅަނގު ދެކުނުން ވައި ޖެހޭ ދުވަސްވަރަށެވެ. “ހުޅަނގު” މި ލަފުޒު އައިސްފައިވަނީ ސިންގަޅަ ބަހުގެ “ހުލަނގާ” މި ލަފުޒުންނެވެ. ހުލަނގާގެ މާނައަކީ ވައެވެ. ހުޅަނގު މޫސުމުގެ ދުވަސްތައް ފެށެނީ އޭޕްރީލް 8 ވަނަދުވހުއެވެ. ނިމެނީ ޑިސެންބަރު 9 ވަނަދުވަހަށެވެ. މި ދެމެދުގައިވާ ދުވަސްތައް ޖުމްލަ 18 ބަޔަށް ބަހާފައިވެއެވެ. އެއީ ހުޅަނގު މޫސުމުގެ 18 ނަކަތެވެ. ހުޅަނގު މޫސުމުގެ ނަކަތްތަކަކީ އައްސިދަ، ބުރުނު، ކެތި، ރޯނު، މިއަހެލި، އަދަ، ފުނޯސް، ފުސް، އަހުލިހަ، މާ، ފުރަ، އުތުރަ، އަތަ، ހިތަ، ހެއި، ވިހާ، ނޮރަ، ދޮށަ އެވެ.

އައްސިދަ (8 އޭޕްރީލުން 21 އޭޕްރީލަށް)

މިއީ ހުޅަނގު މޫސުމުގެ ފުރަތަމަ ނަކަތެވެ. މި ނަކަތުގެ ފެށޭކޮޅު ޢާންމުގޮތެއްގައި ވައިގަދަވެ ވިއްސާރަވާނެއެވެ. ނަމަވެސް ފަހުކޮޅެއްދާއިރު ވާރޭ ވެހޭނީ ވަރަށް މަދުންނެވެ. ފުދޭވަރަކަށް ހޫނުގަދަވާނެއެވެ. ވައި ހުންނާނީ އެވްރެޖްކޮށް ގަޑިއަކު 12.96 ކިލޯމީޓަރުގައެވެ. އެވްރެޖްކޮށް 1.95 އިންޗިއަށް ވާރޭވެހޭނެއެވެ. އަވިދޭނީ އެވުރެޖްކޮށް 116.1 ގަޑިއިރެވެ. މި ނަކަތުގައި މަސްވެރިކަން ދަށްވާނެއެވެ.

އިހުގައި މީހުން ޤަބޫލުކުރާގޮތުގައި މި ނަކަތުގެ ފުރަތަމަ ވިއްސާރައިގައި ވާރޭ ތެމުމުން އެ މީހެއްގެ ނަސީބު ގަދަވާނެއެވެ. ހިންދީ ބަހުން މި ނަކަތަށް ކިޔަނީ “އަސްވިނީ” އެވެ. މާނައަކީ ދެ އަސްވާރުންނެވެ. އަރަބިން މި ނަކަތަށް ކިޔަނީ އައްޝަރަތަން އެވެ. ސިންގަޅަބަހުން ކިޔަނީ އަސްވިދާއެވެ.

ބުރުނު (22 އޭޕްރީލުން 05 މޭއަށް)

މިއީ ހުޅަނގު މޫސުމުގެ ދެވަނަ ނަކަތެވެ. މި ނަކަތް ފެށޭނީ ގަދަވަޔާއި ވިއްސާރައިންނެވެ. ވައިގަދަވުމުގެ ސަބަބުން ކަނޑުތައް ވެސް ވަރަށް ގަދަވާނެއެވެ. ނަމަވެސް ފަހަށް ދާވަރަކަށް ވައިމަޑުވެ އަވިގަދަވެ މޫސުން ރަނގަޅުވާނެއެވެ. މި ނަކަތަކީ ވައި އެނބުރޭ ނަކަތަކަށްވާތީ ވައިޖެހޭނީ އެކިފަހަރު އެކި ދިމާއިންނެވެ. ނަމަވެސް ޢާންމުގޮތެއްގައި ވައިޖެހޭނީ ހުޅަނގުންނެވެ. ވައި ހުންނާނީ ޢާންމުގޮތެއްގައި 18.52 ކިލޯމީޓަރު ބާރުމިނުގައެވެ. ވާރޭ ވެހޭ ނިސްބަތް ހުންނާނީ އެވްރެޖްކޮށް 2.59 އިންޗިއަށެވެ. އަވިދޭނީ އެވްރެޖްކޮށް 115.4 ގަޑިއިރުއެވެ. މި ނަކަތުގައި މަސްވެރިކަން އެހާ ރަނގަޅެއް ނުވާނެއެވެ.

ހިންދީން މި ނަކަތަށް ކިޔަނީ ބަހރަނި އެވެ. ޢަރަބިން ކިޔައި އުޅެނީ އަލްބުތައިންއެވެ. ސިންގަޅަބަހުން ކިޔަނީ ބެރަނައެވެ.

ކެތި (06 މޭއިން 19 މޭއަށް)

މިއީ ހުޅަނގު މޫސުމުގެ ތިންވަނަ ނަކަތެވެ. ޢާންމުގޮތެއްގައި އުޑުމަތި ބަނަވާނެއެވެ. ދޭތެރެދޭތެރެއިން ވާރޭ ވެހޭނެއެވެ. އިހުގައި މީހުން ޤަބޫލުކުރާގޮތުން މި ނަކަތުގައި ހަތް ކޮޅިގަނޑެއް ލައިގަންނާނެއެވެ. ހުޅަނގު މޫސުމުގެ ވިއްސާރަ ފެށިގެން އަންނާނީ މި ނަކަތުންނެވެ. މި ނަކަތުގައި އެވްރެޖްކޮށް 4.41 އިންޗީގެ ވާރޭ ވެހޭނެއެވެ. ވައިޖެހޭނީ ހުޅަނގުންނެވެ. ވައިގެ ބާރުމިން ހުންނާނީ އެވްރެޖްކޮށް 20.37 ކިލޯމީޓަރުގައެވެ. އެވްރެޖްކޮށް އަވިދީފަ އޮންނާނީ 97.4 ގަޑިއިރުއެވެ. މި ނަކަތުގައި މަސްވެރިކަން ދަށްވާނެއެވެ.

ހިންދީބަހުން މި ނަކަތަށް ކިޔަނީ ކްރިއްތިކާއެވެ. އަރަބިން ކިޔަނީ އައްތުރައްޔާއެވެ. ސިންގަޅަބަހުން ކިޔަނީ ކެތިއެވެ.

ރޯނު (20 މޭއިން 02 ޖޫންއަށް)

މިއީ ހުޅަނގު މޫސުމުގެ ހަތަރުވަނަ ނަކަތެވެ. މި މޫސުމުގައި ގަދަވަޔާއެކު ވިއްސާރަކުރާނެއެވެ. މިއީ ދިވެހިންގެތެރޭގައި މަޝްހޫރު ޖޫންޖުލައިގެ ވިއްސާރަ ފެށޭ ނަކަތެވެ. ކަނޑުތައް ވަރަށް ގަދަވާނެއެވެ. ޢާންމުކޮށް ވައިޖެހޭނީ ހުޅަނގުންނެވެ. މި ނަކަތުގައި އެވްރެޖްގޮތެއްގައި 4.7 އިންޗިއަށް ވާރޭ ވެހޭނެއެވެ. ވައިޖެހޭނީ ގަޑިއަކު އެވްރެޖްކޮށް 24.08 ކިލޯމީޓަރުގެ ބާރުމިނުގައެވެ. އަވިދޭނީ އެވްރެޖްކޮށް 89.3 ގަޑިއިރުއެވެ. މި ނަކަތުގައި ވެސް މަސްވެރިކަން ދަށްވާނެއެވެ.

ހިންދީން މި ނަކަތަށް ކިޔައި އުޅެނީ ރޯހިނީއެވެ. ޢަރަބިން ކިޔައި އުޅެނީ އައްދަބްރާންއެވެ. ސިންގަޅަބަހުން ކިޔަނީ ރެހެނާއެވެ.

މިއަހެލި (03 ޖޫންއިން 16 ޖޫންއަށް)

މިއީ ހުޅަނގު މޫސުމުގެ ފަސްވަނަ ނަކަތެވެ. މި މޫސުމުގައި ވައިބާރުވާނެއެވެ. ޢާންމުގޮތެއްގައި ވައިޖެހޭނީ ސީދާ ހުޅަނގުންނެވެ. ދަތުރުފަތުރުކުރަން ދަތިވާ ވަރަށް ކަނޑުތައް ގަދަވާނެއެވެ. ޢާންމުގޮތެއްގައި ވައި ޖެހޭނީ ގަޑިއަކު 20.37 ކިލޯމީޓަރ ބާރުމިނުގައެވެ. ވާރޭވެހޭ މިންވަރު ޢާންމުކޮށް ހުންނާނީ 3.15 އިންޗީގައެވެ. މި ނަކަތުގައި ޢާންމުކޮށް 95.6 ގަޑިއިރު އަވިދޭނެއެވެ. ވައިބާރުވެ ކަނޑުތައް ގަދަވުމުގެ ސަބަބުން މި ނަކަތުގައި މަސްވެރިކަން ދަށްވާނެއެވެ.

ހިންދޫން މި ނަކަތަށް ކިޔަނީ މޮގަސިރްސާ ނުވަތަ މޮގަސިރާސްއެވެ. މާނައަކީ ފުއްލާގެ ބޮލެވެ. ޢަރަބިން މި ނަކަތަށް ކިޔައި އުޅެނީ އަލްހަކާއެވެ. ސިންހަޅައިން ކިޔައި އުޅެނީ މުވަސިރިސާއެވެ.

އަދަ (17 ޖޫންއިން 30 ޖޫންއަށް)

މިއީ ހުޅަނގު މޫސުމުގެ ހަވަނަ ނަކަތެވެ. މި މޫސުމުގައި ވެސް ޢާންމުކޮށް ދަތުރުފަތުރު ކުރެވޭ ވަރަށް ވުރެ ކަނޑުތައް ގަދަވާނެއެވެ. ކަނޑުދަތުރުކުރާއިރު މި ނަކަތުގައި ކޮޅިގަނޑެއް ނަގައިފިނަމަ އިހުގައި ދަތުރުވެރިން އޮޑި ބަހައްޓާނީ ކޮޅިގަނޑުގެ މެދާދިމާއަށެވެ. އެއީ އެގޮތަށް ނަގާ ކޮޅިގަނޑުގައި ޢާންމުކޮށް ވިލާގަނޑު މެދުން ދެއަތަށް ކެހިގެންދާތީއެވެ. ގަދަވައި ހުންނާނީ މިގޮތަށް ކެހިގެންދާ ވިލާގަނޑުގެ ދެކޮޅުގައެވެ. މެދުތެރެއާވީ ދިމާލުގައި ވައި މަޑުވާނެތީއެވެ. ޢާންމުގޮތެއްގައި ވައިޖެހޭނީ ހުޅަނގު ދެކުނުންނެވެ. މި ނަކަތުގައި އެވްރެޖުކޮށް ވައި ހުންނާނީ ގަޑިއަކު 20.37 ކިލޯމީޓަރ ބާރުމިނުގައެވެ. ވާރޭ ވެހޭ މިންވަރު ހުންނާނީ 2.59 އިންޗިއެވެ. ޢާންމުގޮތެއްގައި 100.6 ގަޑިއިރު އަވިދޭނެއެވެ. މި ނަކަތަކީ މަސްވެރިކަން ރަނގަޅު މަސްއައިންތައް ގިނައިން ފެންނަ ނަކަތެކެވެ.

ހިންދޫން މި ނަކަތަށް ދީފައިވާ ނަމަކީ “އަރްދުރާ” އެވެ. މާނައަކީ ތެތްކަމެވެ. ޢަރަބިން މި ނަކަތަށް ކިޔައި އުޅެނީ އަލްހަންއާ އެވެ. ސިންހަޅަބަހުން ކިޔަނީ އަދަ އެވެ.

ފުނޯސް (01 ޖުލައި އިން 14 ޖުލައިއަށް)

މިއީ ހުޅަނގުމޫސުމުގެ ހަތްވަނަ ނަކަތެވެ. މިއީ ވަރަށް ގިނަ ކޮޅިގަނޑުތައް ނަގާ ނަކަތެކެވެ. ވައިބާރުވެފައި ކަނޑުތައް ޢާންމުގޮތެއްގައި ގަދަވާނެއެވެ. ވައި ހުންނާނީ ސީދާ ހުޅަނގުގައެވެ. ކުއްލިއަކަށް ވައިބާރުވުމަކީ މި ނަކަތުގައި ވަރަށް ގިނައިން ވާގޮތެކެވެ. ވައިޖެހޭ ބާރުމިން އެވްރެޖްގޮތެއްގައި ހުންނާނީ ގަޑިއަކު 18.52 ކިލޯމީޓަރ ބާރުމިނުގައެވެ. ޢާންމުގޮތެއްގައި 2.41 އިންޗިއަށް ވާރޭ ވެހޭނެއެވެ. އަވިދޭ ވަގުތުގެ ދިގުމިން އުޅޭނީ 102.9 ގަޑިއިރެވެ. މި ނަކަތުގައި މަސްވެރިކަން އާދައިގެ ވަރަކަށް ރަނގަޅުވާނެއެވެ.ހިންދޫން މިނަކަތަށް ކިޔައި އުޅެނީ ޕުނަރުވާސޫއެވެ. މާނައަކީ ރަނގަޅު ނުވަތަ ތޫނުފިލިއެވެ. ޢަރަބުން މި ނަކަތަށް ކިޔައި އުޅެނީ އައްދިރާއެވެ. ސިންހަޅަ ބަހުން ކިޔަނީ ޕުނަވަސައެވެ.

ފުސް (15 ޖުލައި އިން 28 ޖުލައިއަށް)

މިއީ ހުޅަނގު މޫސުމުގެ އަށްވަނަ ނަކަތެވެ. މި ނަކަތުގައި ޢާންމުގޮތެއްގައި އުޑުމަތި އޮންނާނީ ވަރަށް ބަނަކޮށެވެ. ވާރޭ ވެހުން ގިނަ ވާނެއެވެ. ވައިޖެހޭނީ ސީދާ ހުޅަނގުންނެވެ. ވައިގެ ބާރުމިން ހުންނާނީ ގަޑުއަކު 20.37 ކިލޯމީޓަރުގައެވެ. ވާރޭވެހޭ ނިސްބަތްއުޅޭނީ 3.49 އިންޗީގައެވެ. ޖުމްލަ އަވިދޭ ވަގުތުގެ ދިގުމިނަކީ 89 ގަޑިއިރެވެ. މި ނަކަތުގައި މަސްވެރިކަން ރަނގަޅުވާނެއެވެ. މަސްއައިނުތައް ރަށްތަކާ ވަރަށް ކައިރިން ފެންނާނެއެވެ.

މިނަކަތަށް ހިންދޫން ކިޔައި އުޅެނީ “ޕުޝްޔާ” އެވެ. ޢަރަބިން ކިޔަނީ އަންނަޟްރާއެވެ. ސިންހަޅަބަހުން ކިޔަނީ ޕުޝާއެވެ. މި ނަކަތް ރަމްޒުކޮށްދިނުމަށް ސިންހަޅައިން ބޭނުންކުރަނީ ހަނދުފަޅިއެއް ނުވަތަ ތީރެވެ.

އަހުލިހަ (29 ޖުލައި އިން 10 އޮގަސްޓަށް)

މިއީ ހުޅަނގު މޫސުމުގެ ނުވަވަނަ ނަކަތެވެ. މި ނަކަތުގައި ޢާންމުގޮތެއްގައި އުޑުމަތި އޮންނާނީ ސާފުކޮށެވެ. ވައިމަޑުވުމާއެކު ކަނޑުތައް ވެސް މަޑުވާނެއެވެ. ވައިޖެހޭނީ ސީދާ ހުޅަނގުންނެވެ. ވައިގެ ބާރުމިން ހުންނާނީ އެވްރެޖުކޮށް ގަޑިއަކު 18.52 ކިލޯމީޓަރ ބާރުމިނުގައެވެ. ވާރޭގެ މިންވަރު ހުންނާނީ 2.65 އިންޗީގައެވެ. މި ނަކަތުގައި މަސްވެރިކަން ރަނގަޅުވާނެއެވެ. ފުސް ނަކަތުގައި އަތޮޅުގެ އައްސޭރިފަށާ ކައިރިން ފެނުނު މަސްއައިންތައް މި ނަކަތުގައި މަޑުމަޑުން އަތޮޅުތަކާ ދުރަށް ދާނެއެވެ ހިންދޫންނާއި ސިންހަޅައިން މިނަކަތަށް ކިޔައި އުޅެނީ އަސްލިސާއެވެ. ޢަރަބިން މި ނަކަތަށް ކިޔަނީ އައްޠަރުފްއެވެ.

މާ (11 އޮގަސްޓުން 23 އޮގަސްޓަށް)

މިއީ ހުޅަނގު މޫސުމުގެ ދިހަވަނަ ނަކަތެވެ. މި ނަކަތުގައި ޢާންމުކޮށް ވައި މަޑުވެ ކަނޑުތައް މަޑުވާނެއެވެ. ނަމަވެސް މި ނަކަތާމެދު އިހުގައި ދިވެހިން ބުނެ އުޅޭގޮތުން އަހުލިހައިގައި ވިއްސާރަ ވެއްޖެ ނަމަ މާ ނަކަތުގައި ވެސް ވިއްސާރަވާނެއެވެ. ވައިޖެހޭނީ ޢާންމުކޮށް ސީދާ ހުޅަނގުންނެވެ. ވައިގެ ބާރުމިން ހުންނާނީ ގަޑިއަކު 20.37 ކިލޯމީޓަރ ބާރުމިނުގައެވެ. ވާރޭ ވެހޭ މިންވަރު ހުންނާނީ އެވްރެޖްކޮށް 4.17 އިންޗީގައެވެ. މި ނަކަތުގައި އަވިދޭނީ އެވްރެޖްކޮށް 76.9 ގަޑިއިރުއެވެ. މި ނަކަތުގައި ވިއްސާރަ ނޫން ނަމަ މަސްވެރިކަން ރަނގަޅުވާނެއެވެ.

 ހިންދޫންނާއި ސިންހަޅައިން މިނަކަތަށް ކިޔަނީ މެގާ އެވެ. ޢަރަބިން ކިޔައި އުޅެނީ އަލްޖަބްހާ އެވެ.

ފުރަ (24 އޮގަސްޓުން 6 ސެޕްޓެންބަރަށް)

މިއީ ހުޅަނގު މޫސުމުގެ އެގާރަވަނަ ނަކަތެވެ. މި ނަކަތުގައި ދޭތެރެދޭތެރެއިން ވިއްސާރަކުރާނެއެވެ. މި ނަކަތާއެކު ހުޅަނގު މޫސުމުގެ އެންމެ ގަދަ ދުވަސްތައް ނިމުމަކަށް އަންނާނެއެވެ. ވައިޖެހޭނީ ޢާންމުކޮށް ހުޅަނގު އިތުރުންނެވެ. ވައިގެ ބާރުމިން ހުންނާނީ އެވްރެޖްކޮށް ގަޑިއަކު 18.52 ކިލޯމީޓަރު ބާރުމިނުގައެވެ. ވާރޭ ވެހޭ މިންވަރު އުޅޭނީ އެވްރެޖްކޮށް 1.89  އިންޗީގައެވެ. އެވްރެޖްކޮށް 107.8 ގަޑިއިރު މި ނަކަތުގައި އަވިދޭނެއެވެ. މަސްވެރިކަން އާދައިގެ ގޮތެއްގައި ރަނގަޅުވާނެއެވެ. ޢާންމުގޮތެއްގައި މަސްއައިންތައް ފެންނާނީ އަތޮޅުތަކާ ދުރުން މާކަނޑުންނެވެ.

ހިންދޫން މި ނަކަތަށް ކިޔައި އުޅެނީ ޕުރުވާއެވެ. ޢަރަބިން ކިޔައިއުޅެނީ އައްޒުބްރާ އެވެ. ސިންހަޅައިން ކިޔަނީ ޕުވަޕަލްއެވެ.

އުތުރަ (07 ސެޕްޓެންބަރުން 20 ސެޕްޓެންބަރަށް)

މިއީ ހުޅަނގު މޫސުމުގެ ބާރަވަނަ ނަކަތެވެ. އިހުގެ ޢާންމު ބަހުރުވައިންނަމަ މި ނަކަތުގައި ހަޅަޖަހާނެއެވެ. މީގެ މާނައަކީ ވައި ބާރުވެ ކަނޑުތައް ގަދަވާނެއެވެ. ވައިގެ ބާރުމިން އެވްރެޖްގޮތެއްގައި ހުންނާނީ ގަޑިއަކު 22.22 ކިލޯމީޓަރު ބާރުމިނުގައެވެ. ވައިޖެހޭނީ ހުޅަނގު އުތުރުންނެވެ. ވާރޭ ވެހޭ މިންވަރު ހުންނާނީ 4.59 އިންޗީގައެވެ. މި ނަކަތުގައި އެވްރެޖްކޮށް 90.7 ގަޑިއިރު އަވިދޭނެއެވެ. މި ނަކަތުގައި މަސްވެރިކަން އާދައިގެ ގޮތަކަށް ރަނގަޅުވާނެއެވެ.

މި ނަކަތަށް ހިންދޫން ކިޔައި އުޅެނީ އުއްތަރަ ޕަހލްގުނީ އެވެ. ޢަރަބިން ކިޔައި އުޅެނީ އައްސަރްފާ އެވެ. ސިންހަޅައިން ކިޔައިއުޅެނީ އުތުރުޕަލް އެވެ.

އަތަ (21 ސެޕްޓެންބަރުން 03 އޮކްޓޫބަރު)

މިއީ ހުޅަނގު މޫސުމުގެ ތޭރަވަނަ ނަކަތެވެ. މި ނަކަތުގައި ޢާންމުގޮތެއްގައި އުޑުމަތި ސާފުވާނެއެވެ. ނަމަވެސް ދޭތެރެދޭތެރެއިން ވިއްސާރަ ނަގައި ވާރޭ ވެހޭނެއެވެ. ވައިޖެހޭނި ހުޅަނގުންނެވެ. ވައިގެ ބާރުމިން އެވްރެޖްގޮތެއްގައި ހުންނާނީ ގަޑިއަކު 24.08 ކިލޯމީޓަރު ބާރުމިނުގައެވެ. އެވްރެޖުކޮށް 3.78 އިންޗިއަށް ވާރޭ ވެހޭނެއެވެ. މި ނަކަތުގައި އެވްރެޖުކޮށް 80.5 ގަޑިއިރު އަވިދޭނެއެވެ.  މަސްވެރިކަން ރަނގަޅުވާނެއެވެ. މަސްއައިންތައް އަތޮޅުތަކާ ކައިރިން މި ނަކަތުގައި ފެންނަން ފަށާނެއެވެ.

ހިންދޫން މި ނަކަތަށް ކިޔައި އުޅެނީ ހަސްތާ އެވެ. މީގެ މާނައަކީ “އަތް” އެވެ. ޢަރަބިން ކިޔައި އުޅެނީ އައުވާ އެވެ. ސިންހަޅަބަހުން މި ނަކަތަށް ކިޔަނީ “ހަތަ” އެވެ. މި ނަކަތް ރަމްޒުކޮށްދިނުމަށް ބޭނުންކުރަނީ އަތްތިލައެކެވެ.

ހިތަ (04 އޮކްޓޫބަރުން 17 އޮކްޓޫބަރަށް)

މިއީ ހުޅަނގު މޫސުމުގެ ސާދަވަނަ ނަކަތެވެ. މި ނަކަތުގައި ދޭތެރެދޭތެރެއިން ވިއްސާރަކުރާނެއެވެ. ކަނޑުތައް ޢާންމުގޮތެއްގައި މަޑުވާނެއެވެ. ވައިޖެހޭނީ ހުޅަނގުންނެވެ. ވައިގެ ބާރުމިން ހުންނާނީ އެވްރެޖްކޮށް ގަޑިއަކު 22.2 ކިލޯމީޓަރު ބާރުމިނުގައެވެ. ވާރޭ ވެހޭ ނިސްބަތް ހުންނާނީ އެވްރެޖްކޮށް 4.10 އިންޗީގައެވެ. މި ނަކަތުގައި އެވްރެޖްކޮށް 106.1 ގަޑިއިރު އަވިދޭނެއެވެ. މަސްވެރިކަން ޢާންމުގޮތެއްގައި ރަނގަޅުވާނެއެވެ. މަސްއައިންތައް އަތޮޅުތަކާ ކައިރިން ފެންނާނެއެވެ.

މި ނަކަތަށް ހިންދޫން ކިޔައި އުޅެނީ ސިތުރާ އެވެ. ޢަރަބިން ކިޔައި އުޅެނީ އައްސިމަކް އެވެ. ސިންހަޅައިން މިނަކަތަށް ދީފައިވާ ނަމަކީ ސިތާއެވެ.

ހެއި (18 އޮކްޓޫބަރުން 31 އޮކްޓޫބަރަށް)

މިއީ ހުޅަނގު މޫސުމުގެ ފަނަރަވަނަ ނަކަތެވެ. މިއީ ވައި އެނބުރޭ ނަކަތެކެވެ. މި ނަކަތުގައި ވައިބާރުވެފައި އެކިފަހަރު ވައި ޖެހޭނީ އެކި ދިމާއިންނެވެ. އެކަމަކު ޢާންމުކޮށް ވައި ހުންނާނީ ހުޅަނގުގައެވެ. ވައިގެ ބާރުމިން ހުންނާނީ އެވްރެޖްކޮސް ގަޑިއަކު 22.22 ކިލޯމީޓަރު ބާރުމިނުގައެވެ. 4.37 އިންޗީގެ ވާރޭ ވެހޭނެއެވެ. މި ނަކަތުގައި ޢާންމުކޮށް 109.7 ގަޑިއިރު އަވިދޭނެއެވެ. މި ނަކަތުގައި މަސްވެރިކަން ރަނގަޅުވެފައި ބޭނޭ މަހުގެ ސައިޒު ބޮޑުވާނެއެވެ.

 ހިންދޫން މިނަކަތަށް ކިޔައި އުޅެނީ ސްވާތީ އެވެ. މީގެ މާނައަކީ ކަނޑިއެވެ. އަރަބިން މިނަކަތަށް ކިޔަނީ އަލްގަފްރުއެވެ. ސިންހަޅައިން މި ނަކަތަށް ކިޔަނީ ސާ އެވެ.

ވިހާ (01 ނޮވެންބަރުން 13 ނޮވެންބަރަށް)

މިއީ ހުޅަނގު މޫސުމުގެ ސޯޅަވަނަ ނަކަތެވެ. މި ނަކަތުގައި މޫސުން ރަނގަޅުވާނެއެވެ. ޢާންމުގޮތެއްގައި ވައިޖެހޭނީ ހުޅަނގުންނެވެ. ވައިގެ ބާރުމިން ހުންނާނީ އެވްރެޖް ގޮތެއްގައި ގަޑިއަކު 20.37 ކިލޯމީޓަރު ބާރުމިނުގައެވެ. ވާރޭވެހޭ ނިސްބަތަކީ 3.7 އިންޗިއެވެ. މި ނަކަތުގައި 93 ގަޑިއިރު އަވިދޭނެއެވެ. މި ނަކަތުގައި މަސްވެރިކަން ރަނގަޅުވާނެއެވެ.

ހިންދޫން މި ނަކަތަށް ކިޔައި އުޅެނީ “ވިސާކާ” އެވެ. ޢަރަބިން ކިޔައި އުޅެނީ އައްޒުބަނާން އެވެ. މާނައަކީ ދެ ވަކިގަނޑެވެ. ސިންހަޅަބަހުން މި ނަކަތަށް ކިޔަނީ ވިސާ އެވެ.

ނޮރަ (14 ނޮވެންބަރުން 26 ނޮވެންބަރަށް)

މިއީ ހުޅަނގު މޫސުމުގެ ސަތާރަވަނަ ނަކަތެވެ. މި ނަކަތުގައި ޢާންމުގޮތެއްގައި މޫސުން ރަނގަޅުވާނެއެވެ. ނަމަވެސް ދޭތެރެދޭތެރެއިން ކޮންމެވެސް ވަރަކަށް ވިއްސާރަކުރާނެއެވެ. ކަނޑުތައް އާދައިގެ ގޮތެއްގައި މަޑުވާނެއެވެ. ޢާންމުގޮތެއްގައި ވައިޖެހޭނީ ހުޅަނގު އުތުރުން ގަޑިއަކު 16.67 ކިލޯމީޓަރު ބާރުމިނުގައެވެ. ވާރޭ ވެހޭ ނިސްބަތް ހުންނާނީ 3.33 އިންޗީގައެވެ. މި ނަކަތުގައި 90 ގަޑިއިރު އަވިދޭނެއެވެ. މި ނަކަތުގައި ކަނޑުގެ އޮއިވަރު އެކިގޮތްގޮތަށް ބަދަލުވާނެއެވެ. ނަކަތުގެ 3 ވަނަ ދުވަހުން ފެށިގެން އޮއިވަރު އިރުވައި މޫސުމުގެ ހުންނަ ގޮތަށް ބަދަލުވާން ފަށާނެއެވެ. އިހުގައި މީހުން ބުނެއުޅޭގޮތުން މި ނަކަތުގެ ފުރަތަމަ ވިއްސާރަ އަންނާނީ އިރުމަތިންނެވެ. މި ނަކަތުގެ ދުވަސްވަރު މަސްވެރިކަން ރަނގަޅުވާނެއެވެ.

މި ނަކަތަށް ހިންދޫން ކިޔައި އުޅެނީ އަނޫރާދާ އެވެ. މާނައަކީ ކާމިޔާބީ އެވެ. ޢަރަބިން މި ނަކަތަށް ކިޔައި އުޅެނީ އަލްއިކްލީލް އެވެ. މާނައަކީ “ތާޖު” އެވެ. ސިންހަޅައިން މި ނަކަތަށް ކިޔައި އުޅެނީ “އަނޫރާ” އެވެ. މި ނަކަތް ރަމްޒުކޮށްދިނުމަށް އެމީހުން ބޭނުންކޮށް އުޅެނީ ތީރެވެ.

ދޮށަ (27 ނޮވެންބަރުން 09 ޑިސެންބަރަށް)

މިއީ ހުޅަނގު މޫސުމުގެ އަށާރަވަނަ ނަކަތެވެ. ހުޅަނގު މޫސުމުގެ އެންމެ ފަހު ނަކަތެވެ. މި ނަކަތުގައި ވައި މަޑުވާނެއެވެ. ވައިޖެހޭނީ އިރުއުތުރުންނެވެ ވައިގެ ބާރުމިން ހުންނާނީ ގަޑިއަކު 16.67 ކިލޯމީޓަރު ބާރުމިނުގައެވެ. އެވްރެޖްކޮށް 4 އިންޗިއަށް ވާރޭވެހޭނެއެވެ. އަވިދޭނީ 97.6 ގަޑިއިރުއެވެ. މި ނަކަތުގައި މަސްވެރިކަން ރަނގަޅުވާނެއެވެ.

މި ނަކަތަށް ހިންދޫން ކިޔައި އުޅެނީ ޖެއިސްތާއެވެ. ޢަރަބިން ކިޔައި އުޅެނީ އަލް ޤަލްބު އެވެ. ސިންހަޅަބަހުން ކިޔަނީ ދޭތާ އެވެ.