1041Views 0Comments
ކުޅަދާނަ ވާހަކަދެއްކުންތެރިއަކަށް ވުމަކީ އެކަމުން ވަރަށް ބޮޑު ފައިދާތަކެއް ލިބޭނެ ކަމެކެވެ. ލިބިފައި ހުރި ތަޢުލީމަކާއި ތަޖުރިބާ އެހެންމީހުންނަށް ރަނގަޅު ގޮތުގައި ޙިއްސާކުރުމުން ތިމާގެ އަގު އެހެންމީހުންގެ ކުރިމަތީގައި އުފުލި ތިމާއަށް އަނެކުންގެ ޤަދަރާއި އިޙްތިރާމް ލިބޭ ކަމެކެވެ. މަސައްކަތުގައްޔާއި އެހެނިހެން ކަންކަމުގައި އެކިކަހަލަ ޚިޔާލުތައް ހުށަހަޅަން ފުރުޞަތު ލިބޭހިނދު ތިމާއަށް އެ ފުރުޞަތުގެ ބޭނުން އެންމެ ފުރިހަމައަށް ހިފޭނީ ވާހަކަދެއްކުންތެރިކަމުގެ ހުނަރު ހުރެގެންނެވެ. އަނެކުންނަށް ތިމާގެ ޚިޔާލު ބޮޑު އަގުގައި ވިއްކާލެވޭނީ ތިމާ އެ ޚިޔާލެއް ހުށަހަޅާއިރު އަޑުއަހާ ބައެއްގެ ސިކުނޑިއަށް ރަނގަޅަށް ވަންނާނޭހެން ބަސްމަގު ތަރުތީބުކުރަން އެނގިގެންނެވެ. ރަނގަޅު ވަގުތުގައި ރަނގަޅު ލަފުޒު ބޭނުންކުރަން އެނގިގެންނެވެ. ހަމައެހެންމެ ވާދަވެރި މާހައުލެއްގައި ކުރެވޭ ތަފާތު މަސައްކަތްތަކުގައި ވެސް ތިމާއަށް ކުރިއެރުން ލިބެން އޮތީ ތިމާގެ ސިކުނޑީގައިވާ އެއްޗެއް އަޑުއަހާހިތްވާނެ ގޮތަކަށް، ޝައުޤުވެރިވާނެ ގޮތަކަށް، ގަޔާވާނެ ގޮތަކަށް އެ ވާހަކަތައް އެހެންމީހުންނަށް އިއްވައިދޭން އެނގިގެންނެވެ.
ކިތަންމެ ދޫހެލޭ މީހެއްކަމުގައި ވިޔަސް ވާހަކަދައްކަން ޖެހޭ މަޢުޟޫއަކާ ގުޅޭގޮތުން ޞައްޙަ މަޢުލޫމާތު ލިބިފައި ނުވާނަމަ އެ ދައްކާ ވާހަކައަކު އެއްވެސް އޮއްޓަރެއް ނުހުންނާނެ. އޭރުން އެ ވާހަކައެއް ވާނީ ހާސަރަށެވެ. އެހެންކަމުން އޮއްޓަރު ހުރި އާރުލާ ވާހަކައެއް ދައްކަން ބޭނުންނަމަ ރަނގަޅު މަޢުލޫމާތު ހޯދަން ޖެހެއެވެ. މަޢުލޫމާތު ހޯދުމަށްޓަކައި ފުރަތަމަ އެނގެންޖެހެނީ ޞައްޙަ މަޢުލޫމާތު ހޯދާނެ ގޮތްތަކެވެ. އަދި އެއަށްފަހު އެ މަޢުލޫމާތުތައް ތަރުތީބުކޮށް ހުށަހަޅައިދޭން ވެސް އެނގެންޖެހެއެވެ. ދައްކާވާހަކައަކުން އަނެކުންނަށް އެއްޗެއް ދޭހަވުމުގައި އެންމެ މުހިންމު ދައުރެއް އަދާކުރާ އެއްކަމަކީ ތިމާ އެ މަޢުލޫމާތުތައް ހުށަހަޅައިދޭ ގޮތެވެ. ހުށަހަޅައިދިނުމުގައި ބަސްމަގު ގެންގުޅޭ ގޮތެވެ. ރަނގަޅު ދަނޑިވަޅުގައި ރަނގަޅު ލަފުޒުގެ ބޭނުންހިފާ ގޮތެވެ. ހަމައެހެންމެ ރާގާއި އަޑު ގެންގުޅޭ ގޮތެވެ. އެހެންކަމުން ކުޅަދާނަ ވާހަކަދެއްކުންތެރިއަކަށް ވުމަށް ޓަކައި އެނގެންޖެހޭ އަދި އުނގެނެންޖެހޭ ވަރަށް ގިނަ ކަންތައްތައް އެބަހުއްޓެވެ.
“ވާހަކަދެއްކުންތެރިކަން” މި މައިގަނޑު ސުރުޚީގެ ދަށުން އަޅުގަނޑު މިފަހަރު ގެނެސްދޭން މިއުޅެނީ ވާހަކަދެއްކުންތެރިކަން ދަސްކުރަން ބޭނުންވާ މީހަކަށް އެ ރޮނގުން ކުރިއަށް ދިއުމަށްޓަކައި ބޭނުންވާނޭ ފިލާވަޅުތަކެވެ. އެގޮތުން މި ދާއިރާއިން އަޅުގަނޑަށް ލިބިފައިވާ ތަޖުރިބާގެ އަލީގައާއި އަދި ކަމާބެހޭ ޢިލްމުވެރިންނާއި ފަންނީ މާހިރުން މި ފަންނުގައި ލިޔެފައިވާ ފޮތްތަކުން ނަގާފައިވާ މަޢުލޫމާތު ފަސޭހައިން ދަސްވާނޭ ފަދަ ބީދައަކުން ގެނެސްދެވޭތޯ މަސައްކަތްކުރާނަމެވެ. ޚާއްޞަކޮށް މި މަޢުލޫމާތުތަކަކީ ސްކޫލުތަކުގެ ދަރިވަރުންނަށާއި ސިޔާސީ ދާއިރާއިން ކުރިއަށްދާން ބޭނުންވާ ފަރާތްތަކަށާއި ނޫސްވެރިންނާއި، ޤައުމު ހިންގުމުގެ މަތިފަޑީގައި ތިއްބެވި ފަރާތްތަކަށާއި ވަޒީފާގެ މާޙައުލުގައި ކާމިޔާބީއަށް ވާޞިލުވުމަށް މަސައްކަތްކުރާ ފަރާތްތަކަށް ވެސް ބޭނުން ހިފޭނެ މަޢުލޫމާތުތަކަކަށް ވާނެއެވެ.
ވާހަކަދެއްކުންތެރިކަމުގެ ފަންނަކީ ވަރަށް ވެސް މުހިންމު ފަންނެކެވެ. ބޮޑެތި ހަނގުރާމަތައްކުރުން ހުއްޓާލައި ޞުލްޙަ ޤާއިމްކުރެވެނީ ވާހަކަދައްކައިގެންނެވެ. ހަމަނުޖެހުންތައް މައިތިރިކޮށް ދޭދޭ ޤައުމުތަކުގެ ފެންވަރުގައްޔާއި ފަރުދުންގެ ފެންވަރުގައި ގުޅުންތައް ބަދަހިކުރެވެނީ ވާހަކަދައްކައިގެންނެވެ. ނަމަވެސް ވާހަކަދައްކައިގެން މިކަންކަން ޙާޞިލުކުރެވޭނީ ވަކިގޮތަކަށް ވާހަކަދައްކަން ދަސްކޮށްގެންނެވެ. މި ފަންނުގައި ޤާބިލު މީހަކަށް ވެވިގެންނެވެ. އެފަދަ މީހަކަށް ވުމަށް ޓަކައި ޖެހޭނީ މި ފަންނު އުނގެނި ދަސްކުރާށެވެ.
އަޅުގަނޑު މި ގެނެސްދޭންއުޅޭ މަޢުލޫމާތުގެ އަލީގައި އަޅުގަނޑުގެ އުންމީދަކީ ގިނަބަޔަކު ވާހަކަދެއްކުންތެރިކަމުގެ ފަންނަށް ޝައުޤުވެރިވެ މި ދާއިރާއިން ކުރިއަރައި ދިއުމެވެ. މާތްﷲ އަޅުގަނޑު މި ފަށާ މަސައްކަތުގައި ބަރަކާތްލައްވާށި. އާމީން.
ފިލާވަޅުތަކުގެ އަލީގައި ގެނެސްދެވޭ މަޢުލޫމާތުގެ މައިގަނޑު ސުރުޚީތަކަކީ:
- ވާހަކަދެއްކުންތެރިކަމުގެ ހުނަރު ދަސްކުރަންވީ ކީއްވެ؟
- ހާސްވެ ހިތްބިރުގަތުން ކަނޑުވާނެ ގޮތްތައް
- ދައްކާ ވާހަކައިގެ ދެލިގަނޑު (ސްޕީޗް) ތައްޔާރުކުރުމަށް ކުރަންހުރި ކަންތައްތައް
- ރަނގަޅު އަޑުއެހުންތެރިއަކަށް ވާނެގޮތްތައް
- ވަގުތާއި ޙާލަތަށް ހޭނުމާއި އެހުންތެރިން ދެނެގަންނާނެ ގޮތްތައް
- މަޢުޟޫ ކަނޑައެޅުމާއި މަޢުޟޫއަށް ތައްޔާރުވާނޭ ގޮތްތައް
- ޞައްޙަ މަޢުލޫމަތު ހޯދުމާއި ޞައްޙަކަން ކަށަވަރުކުރުމާއި އެ މަޢުލޫމާތު ހުށަހަޅާނެ ގޮތްތައް
- ލިބިފައިވާ ޚިޔާލު އިތުރަށް ތަނަވަސްކުރާނެ ގޮތްތައް
- ދެލިގަނޑުގެ އޮނިގަނޑު އެކުލަވައިލުން
- ހުށަހެޅުމުގައި (ޕްރެޒެންޓްކުރުން) ބޭނުން ހިފިދާނެ ވަޞީލަތްތައް
- ވާހަކަދެއްކުމުގައި ބަސްމަގު ބޭނުންކުރާނޭ ގޮތްތައް
- ދައްކާ ވާހަކައިގެ ދެލިގަނޑު (ސްޕީޗް) ތައްޔާރުކުރުން
- ޕަބްލިކް ސްޕީކިންގެ ވައްތަރުތައް – އިންފޮމޭޓިވް ސްޕީކިންގ
- ޕަބްލިކް ސްޕީކިންގެ ވައްތަރުތައް – ޕާރސުއޭސިވް ސްޕީކިން
- ޕަބްލިކް ސްޕީކިންގެ ވައްތަރުތައް – ސެރެމޯނިއަލް ސްޕީކިން
- ވާހަކަދެއްކުމުގައި ހަރުދަނާ ގޮތެއްގައި ރައްދު ދޭނެ ގޮތްތައް
- ބަހުސްކުރުން
- ނެގޯޝިއޭޓްކުރުން
