1398Views 0Comments
ޒަމާން ބަދަލުވެއްޖެއެވެ. ކަންކަންކުރަމުން އަންނަ އާދައާއި ވައްޓަފާޅިއަށް ވެސް ބޮޑެތި ބަދަލުތަކެއް އަތުވެއްޖެއެވެ. ޓެކްނޮލޮޖީއާއެކު އަދި ވެސް ދާނީ ކަންކަން ބަދަލުވަމުންނެވެ. މި ބަދަލުތަކާ އެއްހަމައެއްގައި ފައިހަމަކޮށް ދިވެހިން ވެސް ކުރިއަށް ދާންޖެހެއެވެ. މި ކުރިއަރައި ދިއުމުގައި މިހާރު ކަންކުރަމުން އަންނަ އުސޫލުތައް ދޫކޮށް ބަދަލުވަމުންދާ ދުނިޔޭގައި ކަންހިނގާ މަގުބަލައި ދެނެގަނެ، ރަނގަޅަށް ހުރިކަންތައްތައް ދަމަހައްޓައި ރަނގަޅުކުރަން ހުރި ކަންތައްތައް ރަނގަޅުކޮށްލަންޖެހެއެވެ.
ދިވެހިރާއްޖެއަކީ ސައްތައިންސައްތަ އިސްލާމީ ޤައުމެކެވެ. މި ޤައުމުގައި ގިނައީ ވެސް ޒުވާނުންނެވެ. އެހެންކަމުން ކޮންމެ ކަމެއް ވެސް އަމާޒުކުރަން މިޖެހެނީ ޒުވާނުންނަށެވެ. ޒުވާނުންނަކީ މާދަމާގެ ހަރުމީހުންނެވެ. ޤައުމާއިގެން ކުރިއަށް ދާން ތިބޭނީ އެ މީހުންނެވެ. އެހެންކަމުން ޒުވާނުންނަށް އިސްލާމް ދީނުގެ ހަމަތަކާއި އުސޫލުތަކާއި އެ ދީން ގެނެސްދީފައިވާ ރިވެތި އަދަބުތައް އެނގެން އެބަޖެހެއެވެ. ދީނީ ތަޢުލީމު އޮޅުން ފިލަން އެބަޖެހެއެވެ. މިކަން ކުރެވެން އަންނަނީ ޒުވާނުންނަށް ދީން އުގަންނައިދީގެންނެވެ. ޒުވާނުންނަށް ދީން އުނގަންނައި ދެވޭނީ އެމީހުން ދަންނަ ވަޞީލަތްތައް ބޭނުންކޮށްގެން އެމީހުންނާ ގުޅޭ ގޮތަށް އެމީހުން ޝައުޤުވެރިވާނޭ ގޮތަށް އެކަން ކުރެވިގެންނެވެ. އެހެންކަމުން މިއަދުގެ ޒުވާނުންނަށް ދީން އުނގަންނައިދިނުމުގައި ބޭނުންކުރަން އޮތް އެންމެ ޙިކުމަތްތެރި ގޮތަކީ މަޢުލޫމާތު ފެތުރުމުގެ ޒަމާނީ ޓެކުނޮލޮޖީގެ ވަޞީލަތްތައް ބޭނުންކޮށްގެން ދަރުސްތައް ދިނުމެވެ. ނަޞޭޙަތްދިނުމެވެ. ފިލާވަޅުތައް ނަގައިދިނުމެވެ.
ދިވެހިންނަށް ލިބިފައިވާ އެންމެ ބޮޑު ނިޢުމަތަކީ މާތްވެގެންވާ އިސްލާމްދީނެވެ. ދިވެހިން އިސްލާމްދީން އިޚްތިޔާރު ކުރުމަށްފަހު އެ ދީން ނޫން އެހެން ދީނެއް އިޚްތިޔާރުކޮށްފައެއް ނުވެއެވެ. އެހެންނަމަވެސް ކޮންމެ ދުވަސްވަރެއްގައި ވެސް ދިވެހިންގެ ހިތްތަކުން މިދީނުގެ ނޫރު ނިއްވާލުމަށްޓަކައި ތަފާތު ކަންތައްތައް ކުރަމުން އައިސްފައިވެއެވެ. އިހުގައި މިކަންކަން ކުރެވެމުން އައީ ކަނޑިބަޑީގެ ބޭނުންކޮށްގެން ކުރެވޭ ހަނގުރާމަތަކުންނެވެ. މިއަދު އެކަން ކުރަނީ މީހުންގެ ވިސްނުން ބަދަލުކުރުމަށް ކުރެވޭ ފިކުރީ ހަނގުރާމައިގެ ތެރެއިންނެވެ. ވަކިން ޚާއްޞަކޮށް މި ހަނގުރާމަ އަމާޒުކުރެވިފައިވަނީ އެ ޤައުމެއްގައި އުޅޭ ޒުވާނުންނަށެވެ. ޒުވާނުން އެކިއެކި ދަޅަތަކަށް ހެއްލުންތެރި ކުރުވައި ދީނާ ބީރައްޓެހިގޮތްތައް އެއީ ރައްޓެހި ގޮތްތައް ކަމުގައި ވިސްނައިދީގެންނެވެ. މިފަދަ ވިސްނުންތައް ވިސްނައި ދިނުމުގައި އެކަންކުރާ ފަރާތްތަކުން އެންމެ ބޮޑަށް ބޭނުންކުރަނީ ޒަމާނީ މަޢުލޫމާތު ފެތުރުމުގެ ވަޞީލަތްތަކެވެ. އެއީ ޒުވާނުން އެތަކެއްޗަށް ދޯޅުވެފައިވާލެއް ބޮޑުކަމުންނެވެ. އެހެންކަމުން އިސްލާމްދީން ޒުވާނުންގެ ހިތްތަކުގައި ބިންވަޅުނެގުމަށް ކުރަން އޮތްކަމަކީ ވެސް މިދެންނެވި ވަޞީލަތްތައް ބޭނުންކޮށްގެން ދީނީ މަޢުލޫމާތު ފަތުރައި އުނގަންނައިދިނުމެވެ. އެހެންކަމުން އިސްލާމްދީން ފެތުރުމުގައި ބޭނުންކުރަން އޮތް އެންމެ ރަނގަޅު ވަޞީލަތަކީ ވެސް ހަމަ އައިސީޓީ (އިންފޮރމޭޝަން ކޮމިޔުނިކޭޝަން ޓެކްނޮލޮޖީ) އެވެ. ޒުވާނުންނާ މުޢާމަލާތު ކުރަންޖެހޭނީ އެމީހުން ފަރިތަ އެމީހުން ދަންނަ ވަޞީލަތްތައް ބޭނުންކޮށްގެން ކަމުގައި ވާތީއެވެ.
އައި ސީ ޓީ ނުވަތަ އިންފޮމޭޝަން ކޮމިއުނިކޭޝަން ޓެކްނޮލޮޖީ އަކީ މަޢުލޫމާތު ހޯދުމާއި އެއްކުރުމާއި ބޭނުންކުރުމާއި އަދި ފެތުރުމުގައި 21 ވަނަ ޤަރުނާ ހަމައަށް އައި އިރު ފެތުރިފައިވާ އެންމެބޮޑު ވިއުގައެވެ. އައިސީޓީއަކީ އޭގެ ދަށުގައި މުވާޞަލާތުކުރުމާއި، މަޢުލޫމަތު ފެތުރުމާއި މުވާޞަލާތުކުރުމުގައި ނުވަތަ މަޢުލޫމާތު ފެތުރުމުގައި ބޭނުންކުރާ އެންމެހާ ޓެކްނޮލޮޖީގެ ވަޞީލަތްތައް ހިމެނޭގޮތުން ދެވިފައިވާ ނަމެކެވެ. މީގެ ތެރޭގައި ރޭޑިޔޯ، ޓީވީ، ސެލިއުލަރ ފޯނު، ކޮމްޕިޔުޓަރ، ނެޓްވާރކް ހާރޑްވެއަރ، ސޮފްޓްވެއަރ އާއި ސެޓްލައިޓް މެދުވެރިކޮށް ކުރެވޭ މުވާޞަލާތުގެ ވަޞީލަތްތައް ހިމެނެއެވެ. މީގެ އިތުރުން ވީޑިއޯ ކޮންފަރެންސް ހެދުމާއި، ވާރޗުއަލް ކްލާސްރޫމްތަކާއި އީ ލައިބްރަރީތައް ހިމެނެއެވެ. މީގެ އިތުރުން މަޢުލޫމާތު ފެތުރުމުގެ ރަސްމަގު ކަމުގައިވާ އިންޓަރނެޓްގެ އެކިއެކި ވެބްސައިޓްތައް ވެސް ހިމެނެނީ އައިސީޓީގެ ތެރޭގައެވެ.
އިސްލާމީތާރީޚް ދުށް އެންމެފާގަތި ދުވަސްވަރު މި އުންމަތް ކުރިއަރައި ދިޔައީ މުސްލިމު ޒުވާނުންގެ ސާބިތު އީމާންތެރިކަމުގެ ސަބަބުންނެވެ. ހަރުދަނާ ގޮތުގައި ދީން އުނގަންނައި ދެވުމުގެ ސަބަބުން އެ ދަރިން ވެގެން ދިޔައީ ދީނީ އަދި ދުނިޔެވީ ތަޢުލީމު ލިބިފައިވާ ބޮޑެތި ޢިލްމުވެރިންނަށެވެ. އަޅުވެރި ތަޤުވާވެރިންނަށެވެ. ހިތްވަރުގަދަ މުޖާހިދުންނަށެވެ. ނަން މަޝްހޫރު ފާތިހުންނަށެވެ. ދުނިޔެ ދެކެފައި ނުވާފަދަ ޢަދުލުވެރި ވެރިންނަށެވެ. މި ފަދަ ދަރިންތަކެއް އޭރު އުފެއްދުމުގައި ބޭނުންކުރީ އޭރަށް އެންމެ ރަނގަޅު ވަޞީލަތްތަކެވެ. އެއީ ޢިލްމުވެރިންގެ ދަރުސްތަކާއި އެކިއެކި ކުތުބުޚާނާތަކުގައި ހުރި ފޮތްތަކެވެ. މިހާރު މިކަން ކުރުމަށް ބޭނުންކުރަން ޖެހޭނީ މިހާރުގެ ވަޞީލަތްތަކެވެ.
މިއަދު މުސްލިމުންނާ ދެކޮޅަށް މުސްލިމުންގެ ޒުވާނުންގެ ސިކުނޑިތަކާ ކުޅުމަށް އައިސީޓީގެ ވަޞީލަތްތައް ބޭނުންކޮށްގެން ދީނުގެ ޢަދުއްވުން އަންނަނީ މަސައްކަތްކުރަމުންނެވެ. ސަބަބަކީ އެފަދަ ތަކެތި މެދުވެރިކޮށް ޒުވާނުންގެ ސިކުނޑިތަކާ ކުޅެލުމަށް ފަސޭހަވުމެވެ. ތަފާތު ގޭމްތަކާއި ޓީވީ ޕްރޮގްރާމްތައް އުފައްދައެވެ. ތަފާތު ފިލްމުތައް ތައްޔާރުކުރެއެވެ. އިންޓަރނެޓް މެދުވެރިކޮށް މަޢުލޫމާތު ލިބެން ހުރެއެވެ. މި ދެންނެވި ކަންކަމަކީ ޢަޤީދާގެ ހަރުދަނާކަމެއް ނެތް ސިކުނޑިތަކަށް ސަވާރުވުމަށް އޮތް އެންމެ ފަސޭހަމަގެވެ. ނަތީޖާއެއްގެ ގޮތުން މިކަންކަމުގެ އަވައިގައި ޖެހި ޒުވާނުން ވަނީ ޣަރަޤުވެފައެވެ. އެހެންކަމުން މިކަމުން ސަލާމަތްކުރުމަށްޓަކައި ވެސް ހަމަ މި ވަޞީލަތްތައް ބޭނުންކޮށްގެން ދީނީ މަޢުލޫމާތު ދޭންޖެހެއެވެ. އޭރުން ޒުވާނުން ވެސް ޝައުގުވެރިކަމާއެކު އެތަކެތި ބަލާނެއެވެ.
މިއަދު ސުކޫލު ކޮލެޖް ޔުނިވަރސިޓީތަކުގައި ސައިންސްގެ މާއްދާތައް ކިޔަވައިދެމުންދެއެވެ. އެ ތަންތަނުން ދަސްވެނިވާ ދަރިވަރުންނަކީ ޤައުމާއިގެން ކުރިއަށްދާން ތިބި ޒުވާނުންނެވެ. މިފަދަ ބަޔަކު ދީނަށް އަހުލުވެރިކުރުވަން ޖެހެއެވެ. މިކަން ކުރެވޭނެ އެއްގޮތަކީ ތަޢުލީމުގެ ތެރެއިންނެވެ. ކިޔަވައިދިނުމުގައި ކީރިތި ޤުރުއާނާއި ރަސޫލާގެ ސުންނަތުން ސާބިތުވާން ހުރި ޢިލްމީ އަދި ސައިންޓިފިކް ޙަޤީޤަތްތައް ކިޔަވައިދީގެންނެވެ. ސުކޫލުތަކުގައި ކިޔަވައިދޭ އިސްލާމް މާއްދާ ކިޔަވައި ދިނުމުގައި އެއީ ހަމައެކަނި ބޯޑުގައި ލިޔެފައިވާ އެއްޗެއް ނޯޓުކޮށްލުން ނުވަތަ ޓެކްސްޓް ފޮތުގައިވާ އެއްޗެއް ކިޔައި ދަސްކޮށްލުން ކަމުގައި ވާނަމަ އެ މާއްދާ ވާނީ ފޫހި އެއްޗަކަށެވެ. އެ މާއްދާ ކިޔަވައިދިނުމުގައި ފަހުގެ ވަޞީލަތްތައް ބޭނުންކުރަން ޖެހެއެވެ. އެކިއެކި ކަންކަމާ ގުޅޭގޮތުން ހަދާފައިވާ ވީޑިއޯ ދެއްކެން ޖެހެއެވެ. ފޮޓޯ ބޭނުންކުރަންޖެހެއެވެ. ނުވިތާކަށް އެނިމޭޝަން ވެސް ހިމެނިދާނެއެވެ. އޭރުން ކިޔަވާއިރު އިސްލާމް މާއްދާ ވެސް ވާނީ ޝައުގުން ފުރިފައިވާ މާއްދާއަކަށެވެ. ޤުރުއާން ހަމައެކަނި ކިޔެވުމަކުން ޢަރަބި ނުދަންނަ ބަޔަކަށް އެ ފޮތުގެ މަތިވެރިކަމާއި އެ ފޮތުގައި ހުރި މުޢުޖިޒާތްތައް ހިތަށް ނަގައިގަތުމުގައި އުނދަގޫވެއެވެ. ނަމަވެސް ޢަރަބިބަސް ދަންނަ ދީނީ ޢިލްމުވެރިން ޤުރުއާނުގެ އާޔަތްތަކުގެ މާނަ ކިޔަވައިދޭއިރު ޤުރުއާނުގައިވާ ސައިންޓިފިކް ޙަޤީޤަތްތައް މިޒަމާނުގެ ވަޞީލަތްތަކުން ބަޔާންކޮށްދޭކަމުގައި ވާނަމަ އެކަން ސިކުނޑިތަކަށް ނަގައިގަތުމަށް ފަސޭހަވާނެއެވެ. ފަހުމުވުމުގައި ފަސޭހަވާނެއެވެ.
ހަނދަކީ އޭގެ ޒާތުގައި އަލިކަން ލިބިފައިވާ އެއްޗެއް ނޫންކަމަށް އަހަރެމެން ފިލާވަޅުތަކުން ކިޔަވަމެވެ. އެކަމަކު މިވާހަކަ ކީރިތި ޤުރުއާނުގައި އޮންނަކަމެއް މަދަރުސީދައުރު ނިމޭއިރު ވެސް ނޭނގެއެވެ. ބަޔޮލޮޖީ ކިޔަވާއިރު އިންސާނާ އުފަންވުމުގެ އެކި މަރުޙަލާތައް ކިޔަވައި ދަސްކުރަމެވެ. މި ދަސްކުރުންތަކުގައި އެކިއެކި ވީޑިއޯއާއި ކުރެހުމާއި ފޮޓޯ ވެސް ބޭނުންކުރަމެވެ. ކޯރުގެ ފެނާއި ކަނޑުގެ ލޮނުގަނޑު އެއްނުވާނޭކަމާއި އެދެމެދުގައި ފަށަލައެއް ވާކަން ވެސް އަހަރެމެންނަށް އެނގެނީ މި ޒަމާނުގެ ސައިންސުންނެވެ. ކާއިނާތު ޚަލްޤުކުރެއްވުމުގެ ވާހަކަވެސް ހަމައެފަދައެވެ. ނަމަވެސް މި ހުރިހާ ވާހަކައެއް ކީރިތި ޤުރުއާނުގައި ވަރަށް ތަފްޞީލުކޮށް ބަޔާންވެގެންވާކަމެއް ނުދަނެހުއްޓެވެ. އެއީ ތަހުޒީބުކަމަށް ބުނާ ހުޅަނގުގެ ހޯދުންތައް ކަމަށް އަހަރެމެން ހީކުރަމެވެ. އެހެންކަމުން ޒުވާނުންނަށް އޮޅޭގޮތްވެއެވެ. މި ވިސްނުން ދުރުކުރެވޭނީ ބަޔޮލޮޖީއާއި ފިޒިކްސް ފަދަ މާއްދާތައް ކިޔަވައިދޭއިރު އެކަންކަން ޤުރުއާނުގައި ހުރި ކަންތައްތަކާއި ގުޅުވައިގެން ކިޔަވައިދީގެންނެވެ. އައިސީޓީއާއި، ޢިލްމާއި ދީން އެއް ސިކުނޑިއަކަށް ޖަމާކުރެވިގެންނެވެ. މިގޮތަށް ކިޔަވައިދެވޭނީ އެ މާއްދާއެއް ކިޔަވައިދޭ މުދައްރިސަކީ އިސްލާމީ ތަޢުލީމުން ވެސް ރޯފިލާފައި ހުރި މީހަކަށް ވެގެންނެވެ. ހުޅަނގުގެ ދުނިޔަވީ ތަޢުލީމުން އެކަނި ދަސްވެނިވެގެން މިކަމެއް ނުވާނެއެވެ. މިއަދު މި ދިވެހި މުޖުތަމަޢުން އުނިކަމަށް ފެންނަ އެއްބަޔަކީ ދީނީ ޢިލްމާއި ދުނިޔަވީ ޢިލްމު ގުޅުވާލައިގެން ކިޔަވައިދޭން ދަންނަ މުދައްރިސުންނެވެ. ދިވެހިރާއްޖޭގެ ފުރަތަމަ އިސްލާމީ ޔުނިވަރސިޓީއާއެކު މިކަންކަން ޙައްލުވާނެކަމަށް ކުރެވޭ އުއްމީދު ބޮޑެވެ.
ޒުވާނުން ދީނާ ދުރަށް ދިއުމުގެ މައްސަލަ ޙައްލުކުރުމަށް އޮތް އެންމެ ރަނގަޅުގޮތަކީ ޒުވާނުންގެ ސިކުނޑިއަށް ވާޞިލުވާނޭގޮތަކަށް ދީނުގެ ޢިލްމު ފޯރުކޮށްދިނުމެވެ. މިކަން ކުރެވިދާނެ ގޮތްތަކަކީ ދީނާ ގުޅުންހުރި ފޯނު އެޕްލިކޭޝަންތައް ދިވެހިބަހުން އުފެއްދުމާއި، އިސްލާމް މާއްދާ ކިޔަވައި ދިނުމުގައި އައިސީޓީގެ ވަޞީލަތްތައް ބޭނުންކޮށްގެން މާއްދާއަށް ސައުޤުވެރިކަން އުފެއްދުމާއި، ސައިންސްގެ މާއްދާތައް ކިޔަވައިދޭއިރު އެކަންކަމާ ޤުރުއާނާ ހުރި ގުޅުން ބަޔާން ކުރުމާއި ދީނީ ޢިލްމުވެރިން އައިސީޓީއަށް ވަރަށް ބޮޑަށް އަހުލުވެރިވުމެވެ. ހަމައެހެންމެ ސުކޫލުތަކުގައި ކިޔަވައިދޭ މާއްދާތައް ކިޔަވައިދިނުމުގައި، އެ ކިޔަވައިދޭ އެއްޗެއް ދީނުގެ ޙަޤީޤަތްތަކާއި ގުޅުވައިގެން ކިޔަވައިދީގެންނެވެ.
ދީނަކީ ތިމާގެ ދުނިޔެއާއި އާޚިރަތުގެ މަގަށް ސީދާގޮތުގައި މަގުދަށްކައިދޭ އިލާހީޤާނޫނެވެ. ވުމާއެކު އަޅުގަނޑުމެންގެ ޒުވާނުންނަކީ، މުސްލިމު މަޔަކާ ބަފަޔަކަށް އުފަންވީތީ ހަމައެކަނި ނަމެއްގައި އެމީހުންގެ ފަރާތުން އިސްލާމްދީން ވާރުތަވީ ބަޔަކަށް ވެގެން ކަމަކުނުދާނެއެވެ. ތިމާގެ ކިބައިގައި އިސްލާމްވަންތަ ޝަޚްޞިއްޔަތެއް، އެތެރެފުށާއި ބޭރުފުށުން ވެސްފެންނަން ޖެހޭނެއެވެ. އަދި އިސްލާމްދީނުގައި އަންގަވާފައިވާ ގޮތަށް އުޅުމާއި ގުޅުމާއި ޢަމަލުތައް ވެސް ބަހައްޓަން އެނގެންޖެހޭނެއެވެ. އެކަންކަން ފުރިހަމަގޮތުގައި ކުރެވޭނީ ކިޔަވައިދިނުމުގައި ދުނިޔަވީ ތަޢުލީމާއި ދީނީ ތަޢުލީމު އެއްތަންކުރެވިގެންނެވެ.
